Србија преку САД до меч за ново олимписко злато

Селекцијата на Србија е првиот финалист во машка конкуренција на турнирот во ватерполо на Летните Олимписки Игри кои се одржуваат во Франција.

Српската селекција не блескаше во групната фаза, но во нокаут фазата е сосема друг тим, па така откако пронајде решение за Грција денеска ја доби полуфиналната битка со САД со 10:6.

Нашите соседи беа одлични кога на теренот имаа човек-два повеќе во базенот за разлика од противникот кој имаша катастрофална реализација и севкупно многу загубени топки за да се добие натпревар во оваа фаза и тоа против репрезентација од ваков тип.

Ова значи дека Србите ќе се борат за трето олимписки злато во низа, а за да останат на врвот ќе мора да го совладаат подобриот од Унгарија-Хрватска, дуел закажан за 19:35 часот.