Србија од минус 24 до билет за полуфиналето на ОИ

Селекцијата на Србија успеа да се пласира во полуфиналето на кошаркарскиот турнир во машка конкуренција каде за ривал ќе го има подобриот од вечерашниот меч меѓу Соединетите Американски Држави и Бразил.

Србите во една супер интересна пресметка која донесе и дополнителни пет минути славеше над репрезентацијата на Австралија со 95:90.

Избраниците на Пешиќ губеа и со 24 разлика во второто четвртина, ама во ниту еден момент не се откажаа, се бореа и на паузата дојдоа до „само“ минус 12 (54:42). Водени до таа нова енергија беа фантастични по одморот и третиот период го реализираа со 25:11 за пресврт и водство од 67:65.

Многу неизвесно и драматично беше во четвртиот период во кој Србија го имаше водството, ама Австралија постојано беше тука, блиску, па регуларнито дел заврши со тежок кош на Милс за 82:82.

Новиот „период“ мина во знакот на нашите соседи кои со 13:8 поминаа во наредната фаза и ќе се борат за медал.

На Јокиќ му фалеше само една асистенција за трипл-дабл (21 поен, 14 скокови и 9 асистенции), капитенот Богдановиќ додаде 17 кошеви, Мициќ застана на 14 поени.

Милс и Гиди на другата страна заедно искомбинираа 51 поен.