Спортскиот директор на Баерн го истрола Челси: Ние не сакаме да „крадеме дресови“

Баерн Минхен ќе ја започне новата сезона под водство на новиот тренер Венсан Компани, кој пак го реконструираше тимот со помош на клупските директори.

Спортскиот директор Макс Еберл зборувал со новинарите на тема засилувања и го објаснил начинот на кој Баерн ги носел одлуките, при што не заборавил да го истрола Челси.

– Кога го планирате составот, се надевате дека ќе нема многу повреди, но истовремено не е убаво вештачки да се зголемува бројот на достапни фудбалери.

– Ние имаме одличен состав и млади фудбалери на кои сакаме да им дадеме шанса. Одлуките ги носевме со Компани и беа насочени кон сегментите каде мислевме дека можеме да добиеме највеќе.

– Прво го планираме составот, а потоа трошиме пари, но во одреден момент мора и да заработите пари. Можете да ја одработите сезоната со 44 фудбалери, но тоа е тешка ситуација за менаџирање од страна на тренерот. А, потоа ќе треба да „крадете и дресови“, а ние не го правиме тоа во Баерн, – рекол Еберл алудирајќи на прекубројниот ростер на Челси, како и фактот што клубот им ги одзеде „седумката“ и „четиринаесетката“ на Рахим Стерлинг на Тревор Чалоба и им ги додели на засилувањата Педро Нето и Жоао Феликс.