Спортинг експресно го назначи наследникот на Аморим: Поранешен португалски репрезентативец ќе ги води „лавовите“

Спортинг Лисабон енергично му се заблагодари на Рубен Аморим за се она што му го донесе на клубот во изминатите четири години, но во период во кој тимот изгледа недопирливо во португалското првенство, актуелниот шампион веќе мисли на новата етапа.

Аморим си замина од Спортинг со 11 победи на 11 одиграни натпревари во домашното првенство, па откако се одјави на извонреден начин против Брага, клубот од „Жозе Алвеладе“ попладнево го именуваше и тренерот кој ќе го наследи досегашниот лидер.

Спортинг се одлучи за проверена опција и за човек кој ги познава вредностите и секојдневните активности во клубот, а тоа е некогашниот португалскиот репрезентативец, Жоао Переира.

Откако ја заврши играчката кариера, Переира повеќе од две години мина во младинските категории на Спортинг, па откако успеа да ги следи принципите на Аморим како тренер на вториот тим, сега добива шанса да го води првиот.

Спортинг го најави Жоао како официјален наследник на Рубен, па така поранешниот играч на Бенфика и Валенсија сега ќе има за цел да ја продожи добрата работа која досега ја вршеше новиот менаџер на Манчестер Јунајтед.