„Спорт“ ги објави платите на ѕвездите на Барселона: Де Јонг заработува двојно повеќе од Гундоган

Барселона добро ја започна сезоната во која ја брани титулата во шпанското првенство, а избраниците на Чави Ернандес ќе се обидат да ги исполнат клупските амбиции сериозно мотивирани и од милионските суми кои ги заработуваат.

Дел од играчите посебно се истакнуваат со своите плати, кои ги објави весникот „Спорт“, а на врвот е Френки де Јонг, кој заработува неверојатни 37,5 милиони евра.

Годишната плата на Холанѓанецот е недостижна дури и за играчи како Роберт Левандовски и Илкај Гундоган, па двајцата следуваат на второто и третото место со годишна плата од 20,83 милиони, односно 18,75 милиони евра.

Меѓу дефанзивците најдобро платен е Жил Кунде, кој сезонава од Барселона ќе добие 13 милиони евра.

Во групата играчи кои заработуваат 10 милиони или повеќе се и Рафиња (12,5 милиони евра), Феран Торес (10 милиони евра) и Жоао Кансело (12,5 милиони евра).

Младиот Ламине Јамал ќе добие 1,67 милиони евра, а Жоао Феликс оваа сезона ќе игра за плата од 4 милиони евра.