Спалети: Ова е добро за репрезентацијата, тоа е напредок за нашиот спорт

Голема борба се води во Серија А во актуелнава сезона или поточно како ретко досега имаме вистина гужва на самиот врв на табелата, односно од првото до шестото место разликата е само два бода.

Наполи, Аталанта, Фиорентина, Интер, Лацио и Јувентус покажаа најмногу во досегашните 12. кола, а оваа израмнетост, неизвесност дефинитивно го радува италијанскиот селектор Лучијано Спалети.

-Ова е добро за репрезентацијата. Им честитав на моите играчи затоа што е одлична сезона која треба да се следи, со одличен фудбал и одлични натпревари. Оваа зголемена конкурентност е добра за сите. Помалку реномирани тимови им задаваат потешкотии на тимовите на врвот на табелата, тоа е напредок за нашиот спорт, -вели Спалети на кого исто му е драго што Италијанци ја предводат листата на стрелци во Калчото (Ретеги и Кен).

-Го покажуваат она што се надевав да го видам од нив, среќен сум што ги гледам меѓу најдобрите стрелци во нашето првенство. Кен е во одлична форма, -истакна стратегот.

„Аѕурите“ ги очекуваат дуели со Белгија и Франција во Лигата на нации.