„Сонцата“ се откажаа од големата ѕвезда: Крис Пол станува слободен агент

НБА сезоната се уште е во тек за Денвер и Мајами кои се дел од големото финале, но останатите франшизи веќе некое време се на летна пауза и прават стратегии за следната сезона.

Феникс Санс покажува најголеми активности во изминатите 30 дена и експресно најде замена за отпуштениот Монти Вилијамс, но пристигнувањето на Френк Вогел како тренер носи со себе и една тешка одлука.

Санси донеле одлука да не го продолжуваат договорот со големата ѕвезда во првиот тим, ветеранот Крис Пол кој во мај наполни 38 години.

Искусниот плејмејкер го носеше дресот на Феникс во изминатите три сезони и во 2021-ва година беше дел од големото финале, но ниту со овој тим не успеа да стигне до толку посакуваната НБА титула.

Пол оваа сезона имаше големи проблеми со повредите и ги пропушти последните плејоф натпревари, па така не можеше да му помогне на тимот во поразот од Денвер од 4:2.