Солскјер: Го купивме Роналдо за да спречиме сензационален трансфер

Оле Гунар Солскјер беше дел од бизнис форумот во Лилсторм и имаше добра шанса да зборува со неколку домашни медиуми, кои пак експресно ја искористија шансата да побараат одговори за неговиот последен престој во Манчестер Јунајтед.

Норвешкиот стручњак беше најзаслужен за враќањето на Кристијано Роналдо на „Олд Трафорд“ и тој добро се погрижи за комплетирање на зделката со Јувентус, а сега самиот Оле признава дека се активирал за да спречи сензационален трансфер.

– Кристијано Роналдо беше меѓу најдобрите играчи во светот 15 години и претходно имав можност да играм со него. Тој имаше историја со Јунајтед и во тој период го напушташе Јувентус.

– Го купивме за да не дозволиме сензационален трансфер. Не смеевме да дозволиме да заврши во Манчестер Сити, бидејќи најверојатно ќе постигнеше повеќе голови и од Халанд.

– Зборував со Кристијано, го доведовме во Манчестер Јунајтед, а потоа мислам дека тоа влијаеше врз другите играчи. Некои играчи се почувствуваа помалку вредни со таква суперѕвезда во тимот. Тој беше добар, беше најдобар стрелец таа сезона, но јас бев надвор од тимот после само 10 недели, – се потсетува Оле.