Соиграч на Пандев опиша каков човек е „арогантниот“ Роналдо

Кристијано Роналдо се врати во Торино и ќе мора во наредниот период да мине нова изолација пред да се врати на тренинзите кои веќе почнаа да ги закажуваат клубовите во Италија, а во меѓувреме, доби неочекувана пофалба од еден поранешен соиграч кој сега ја дели соблекувалната со нашиот Горан Пандев.

Матија Перин се врати во Џенова во зимскиот преоден рок со цел да ја врати минутажата која дефинитивно му недостасуваше во Јувентус, но сега соиграчот на Пандев се најде во фокусот во Италија откако на Инстаграм вклучувањето детално опиша какво мислење има за Португалецот кој многумина го доживуваат како арогантен.

– Роналдо дефинитивно не е арогантен, за тоа можам да сведочам. Во текот на изминатото лето, кога заминав за Португалија да потпишам со Бенфика, тој ми помогна да си најдам дом. На крајот трансферот не се случи, но тој ми помогна во секој поглед, – открива Перин и додава.

– Ми порача дека правам добар избор и даде навистина добри препораки за мене. Тоа не го прави секој, можам да кажам дека тој секогаш е отворен и присутен за секој во соблекувалната. Тој е топ играч, но и одличен човек, – завршува Перин.