Слот за пропаднатата трансфер операција: Не е лесно да се најдат играчи, се пробавме!

Ливерпул и понатаму останува без ниту едно засилување во овој преоден рок што дефинитивно е големо изненадување ако се земе предвид дека екипата има и нов тренер во името на Арне Слот кој дојде на местото на Јирген Клоп.

Доаѓањето на нов тренер секогаш носи нови идеи, потези, ама премиерлигашот не „мрда“ со тоа што мора да се каже дека во изминативе 10 дена имаше еден неуспешен обид, пропадната трансфер операција за шпанскиот репрезентативец, Мартин Зубименди.

„Црвените“ беа подготвени да ја активираат октупната клаузула, ама играчот за врска реши да му каже „НЕ“ на премиерлигашот.

-Веќе многу пати реков дека нашиот тим е навистина силен, така што не е лесно да се најдат играчи за засилувања. Зубименди беше еден, но тој одбра да не дојде овде, па одиме напред со овие што ги имаме. Ние сме на добро место и Ричард се обидува да го подобри тимот во позадина. Зубименди не сакаше да дојде, а Ричард проба се. Го задржавме истиот тим, но ги загубивме Тиаго, Џоел и Адријан, а вие секогаш зборувате за трансфери, но ние веќе имаме позитивен тим, -рече Слот кој говореше за пасивноста на клубот на пазарот.

-Тој аргумент не го разбирам. Ако не се засилилиш, стануваш послаб? Остануваме исти. Навистина верувам дека можете да си помогнете на тренинзите и да се подобрите. Тоа им помогна на играчите да се подобрат овде. Ако другите клубови се засилат, стануваат подобри, но не е секогаш точно дека новите играчи ве прават посилен.

-Секој играч во тимот има потреба од перспектива преку минути за игра. Ако продолжите да внесувате играчи, енергијата се намалува. Јас и Ричард се обидуваме да се засилиме, ако мислиме дека е идеален, се обидуваме да го донесеме. За жал, тој што го најдовме (Зубименди) рече не, -истакна Холанѓанецот.