Слот: Пред Ливерпул се три финалиња

Ливерпул утре го очекува дуел со Саутемптон во Премиер лигата, дуел на кој е апсолутен фаворит против „фенерџијата“ во шампионатот, но менаџерот Арне Слот е внимателен и на оваа пресметка заедно со следните две кои следат гледа на три финалиња.

До репрезентативната пауза „црвените“ ги очекува реваншот со Пари Сен Жермен во Лигата на шампионите, а потоа и битката со Њукасл на „Вембли“ за трофејот во англискиот Лига Куп.

-Мојот целосен фокус сега е на Саутемптон. Тоа е прво од трите финалиња што ќе се играат во претстојната недела. За мене, натпреварот со Саутемптон е убедливо најважниот во неделата, не само затоа што е првиот што го играме туку затоа што е многу важен натпревар за нас.

-Ова е недела која ја чека секој навивач на Ливерпул. Знаеме дека финалето е таму и сите веќе ми зборуваат за тоа како ќе биде атмосферата на вечерта во Лигата на шампионите, но навистина се надевам дека нашите навивачи утре ќе бидат најгласни, не во финалето или против ПСЖ, туку утре. Морам да ги убедам моите играчи дека играме три финалиња, а се надевам дека малку ќе влијаам и на нашите навивачи, па тие ќе разберат колку ќе бидат важни утре. Се надевам дека нема да дојдат пет минути пред почетокот.

-Се надевам дека стадионот ќе биде целосно исполнет половина час пред почетокот и играчите ќе ја добијат наградата за нивниот настап во Париз, за ​​нивната напорна работа. Навивачите имаат одлични песни. Тие се навистина креативни, па да ги слушнеме утре, -истакна Слот.