Слот ја спореди тактиката на Плимут со онаа на Јунајтед: Тешко се справуваме со таква игра

Плимут ја приреди најголемата сензација во 4-та рунда на ФА Купот и успеа да го елиминира Ливерпул во раната фаза на натпреварувањето, победа која беше остварена со резутлат 1:0.

Последнопласираниот тим во Чемпионшип му зема скалп на лидерот во Премиер лигата и уште еднаш покажа дека фудбалот може да биде многу непредвидлива игра, а доста интересна за новинарите во Англија беше и анализата на Арне Слот.

Менаџерот на Ливерпул призна дека Плимут му направил огромни проблеми на неговиот тим, споредувајќи ја тактиката на второлигашот со онаа на Рубен Аморим и неговиот Манчестер Јунајтед.

– Неколку пати оваа сезона видовме дека имаме проблеми кога играме против вакви тимови. Гледавме константни долги топки, таканаречени втори топки и навистина ни е тешко да се справиме со таква игра.

– Се соочивме со вакво нешто и на домашен терен против Манчестер Јунајтед. Плимут имаше сличен стил на игра како Јунајтед, ни играа со низок блок и со долги топки. Иако сега игравме со комбиниран тим, против Јунајтед на теренот беа стартери, а и тие се мачеа со ваков стил на игра, – изјави Слот.