Скопскиот Виз Ер маратон ќе се трча во посебни услови и со изменет старт и финиш

Оваа недела на улиците во нашата престолнина ќе се одржи традиционалниот Виз Ер Скопски маратон, што ќе биде 16-то издание на најмасовната трка во Македонија.

Поради исполнување на мерките и протоколите кои ги налага Владата за заштита од Ковид 19, оваа година маратонот ќе има иста рута, но ќе има различен старт и цел кој овојпат ќе биде пред влезот на Спортскиот Центар Борис Трајковски.

Поради проблемите кои ги направи светската пандемија, скопскиот маратон нема да може да ги дочека натпреварувачите од Африка кои стандардно се најдобри и најбрзи, но затоа сите останати натпреварувачи ќе можат да уживаат и да се рекреираат, припазувајќи ги протоколите за заштита на стартот и на целта каде обврска е да носат маски.

– Оваа година ќе имаме 1500 учесници во три трки: маратон, полумаратон и штафетен маратон „ЕУ за тебе“. И оваа година ќе имаме квалитетни натпреварувачи, како и досега, но поради пандемијата влезовите во државите се ограничени и оваа година ќе бидеме без натпреварувачите од Африка.

– Заради целата ситуација со вирусот Ковид-19, го променивме стартот и целта, кои што ќе бидат пред влезот на СЦ Борис Трајковски, а патеката е иста. Тоа е така затоа што тој простор ни дозволува да ги испочитуваме сите протоколи донесени специјално за маратонот, – изјави Кире Синадиновски, директор на Виз Ер Скопски маратон.