Скандал во соблекувалната на Филаделфија: Ембид имал физички контакт со новинар

Филаделфија ги разочара своите фанови со поразот на домашен терен од Мемфис, но она што е топ тема во американската јавност е неговиот дуел со локален новинар по крајот на средбата.

Маркус Хејс влегол во соблекувалната на Филаделфија за да добие изјава од некој од кошаркарите, но бил пречекан од Ембид кој имал сериозни забелешки за неговата последна колумна.

Хејс истата ја започнал споменувајќи го трагично загинатиот брат Артур и синот на кошаркарот кој го добил истото име во негова чест, за што заработи многу критики и од фановите, па мораше да го коригира текстот и јавно да се извини за својата постапка.

Ембид лично му кажал на Хејс што мисли за тој потег, а во еден момент и го оттурнал новинарот, по што присутните спречиле поголем инцидент.

– Следниот пат кога ќе ги споменеш мојот мртов брат и моето дете ќе видиш што ќе ти се случи, а јас ќе мора да живеам со последиците, – рекол Ембид во дел од расправијата во која Хејс и лично му се извинил на кошаркарот.

Филаделфија потврди дека се случил ваков инцидент и дека соработува со НБА по ова прашање.