Скандал во Купот на Македонија: Ракометарки намерно промашуваа и си даваа автоголови, министерот Ристовски најави жестока казна за клубовите (ВИДЕО)

Скопје и Гевгелија денеска се соочија во Купот на Македонија, средба која донесе скандалозни и срамни сцени за нашиот ракомет.

Гостинскиот тим на крајот победи со 17-16, но она што се случуваше во завршните пет минути уште долго ќе се зборува и прераскажува.

Двете екипи во тој период си постигнуваа автоголови, шутираа над голот или покрај, додаваа погрешно се со цел да не постигнат гол. Збунети од целата ситуацијата беа и судиите кои го прекинаа натпреварот, меѓутоа по консултации со записничката маса истата продолжи.

Средбата заврши како што заврши, но клубовите допрва ќе добијат жестоки казни за ова однесување и тоа го најави министерот на спорт Борко Ристовски кој во гостувањето на ТВ Сител изјави дека на двете екипи ќе им бидат одземени лиценците за занимавање со дејност спорт.