Сити го преслуша Баерн во Манчестер, Интер го освои „Луж“ (Видео)

Манчестер Сити е со една нога во полуфиналето во Лигата на шампионите, но сепак ќе мора да го преживее Минхен и да не дозволи чудесен пресврт на германскиот првак кој вечерва беше надигран на „Итихад“.

Тимот на Пеп Гвардиола максимално профитираше од напаѓачкиот и директен фудбал, но и од грешките кои ги направи потесната одбрана на Баерн, а тука пред се се мисли на Упамекано.

Големото европско дерби беше отворено со ремек-дело на Родри во првото полувреме, а доминацијата на Сити во овој дел од играта најдобро ја опишува тоа што Баерн не испрати директен удар кон голот.

На стартот на вториот дел, Сане во три наврати го тестираше Едерсон и за малку не донесе израмнување, но по почетниот притисок на баварците, топката повторно ја „нагазија“ момците на Гвардиола. Пеп го повлече од игра Де Брујне кој имаше едно опасно излизгување, но иако се чинеше дека тоа ќе влијае на креацијата, тоа не беше случај.

Грилиш ја искористи грешката на Упамекано и додаде до Халанд, а потоа овој го пронајде Бернардо Силва кој погоди за 2:0. Ова им даде ветер во грб на играчите на Сити, кои брзо преку Ерлинг Халанд дојдоа до 3:0 и огромна предност пред реваншот на „Алијанц арена“ кој се игра за осум дена.

На вториот четвртфинален дуел вечерва, Интер покажа квалитет и го освои „Луж“, а стрелци на погодоците во триумфот од 0:2 беа Барела и Лукаку.