Синер: Разочаран сум од одлуката на ВАДА

Јаник Синер рано утрово го играше својот меч од второто коло во Пекинг, а додека тој се соочуваше со потешкотии на теренот, во јавноста главна вест стана соопштението од ВАДА.

Светската антидопинг агенција објави дека поднела жалба за одлуката за италијанскиот тенисер и побара двегодишна суспензија поради користење допинг, па оваа афера сега добива нова епизода и ќе мора да биде „чешлана“ и од страна највисокиот суд.

Судот за спортска арбитража во Лозана сега ќе го има последниот збор и ќе пресуди дали Синер ќе заработи суспензија, или пак ќе остане на првичната одлука од тениското тело ИТИА кој пресуди во корист на Италијанецот.

Синер денеска направи пресврт и победи против Сафиулин со 2:1 во сетови, а по мечот не можеше да ги избегне прашањата за новата епизода во неговата допинг афера.

– Не можеме да контролираме се што се случува околу нас. Јасно е дека сум многу разочаран од одлулката на ВАДА и изненаден сум од нивната жалба. Да бидам искрен, имав три сослушувања и сите три завршија позитивно за мене. Не очекував ваков развој. Неколку дена знаев дека од ВАДА ќе се жалат и дека денеска ќе биде официјално објавено, така да бев подготвен за нови реакции, – изјави Синер.