Синер разочаран од дел од колегите: Сега знам кој ми е пријател, а кој не

Јаник Синер избегна подолга суспензија и покрај тоа што имал два позитивни допинг теста, но малата количина на недозволената суспстанца и доброто објаснување од одбранта, на крајот направија светскиот рекет број еден да мине без казна.

Како што објаснија од тимот на Италијанецот, Јаник бил контаминиран од забранетата супстанца клостебол по пат на масажа од својот физиотерапевт Џакомо Налди, кој за време на Индијан Велс користел лек со таква содржина поради расекотина на прстот.

Ова се покажа како повеќе од доволно добра одбрана за мирно да се затвори случајот, но ваквиот епилог разлути голем број тенисери, кои јасно му сврте грб на Италијанецот и побараа да добие двегодишна казна.

Јасно е дека Синер ќе биде во центарот на вниманието за време на секој меч кој ќе го одигра на Ју-Ес Опен, но како што вели самиот, барем сега ќе знае кои му се пријатели, а кои не.

– Дали ми е нарушена репутацијата? Тоа е добро прашање….. Од моја гледна точка, јас продолжив да играм тенис бидејќи знаев дека не сум направил ништо лошо. Знаев дека сум чист и сите кои ме познаваат, знаат дека не би направил такво нешто. Јас секогаш ќе останам фер играч.

– Свесен сум дека објавата во јавноста менува некои работи околу мене, знам дека се крена голема прашина. Сите кои ме познаваат барем малку, знаат дека не би направил ништо против правилата. Не мора да се навраќам и да зборувам дека ова беше многу тежок период за мене. Сега бар ќе дознаам кои ми се пријатели, а кои не. Моите пријатели знаат дека јас не би направил такво нешто, моите пријатели секогаш ќе стојат зад мене, – изјави Синер.