Синер подобар од Медведев, Швјонтек остана без полуфинале во Њујорк

Јаник Синер обезбеди место во полуфиналето на Ју Ес Опен и тоа со победа над големиот ривал Данил Медведев.

Дуелот меѓу двајцата грен-слем победници предизвика посебно внимание, а првите два сета донесоа контрастен резултат, односно 6:2 за Синер во првиот и 6:1 за Медведев во вториот сет.

Сепак, Италијанецот го засили темпото во продолжение и ги доби наредните сетови со 6:1 и 6:4 и на тој начин останува во битка за нова титула на најпрестижните турнири.

Ваквиот епилог подразбира полуфинален дуел на Синер со најдобриот британски тенисер во моментов, Џек Дрејпер, но дефинитивно и нов победник на Ју Ес Опен.

Покрај учесниците во ова полуфинале, трофеј во Њујорк немаат ниту Американците Фриц и Тиафо, кои ќе играат во второто полуфинале, а воопшто немаат ниту грен-слем титула.

Женскиот дел од турнирот остана без првиот светски рекет Ига Швјонтек, која утринава загуби од Џесика Пегула во два сета. Во полуфиналето Пегула ќе се соочи со Мучова, додека Сабаленка за противничка ќе ја има Наваро.