Синер недопирлив за Руд, завршниот чин во Торино носи реприза на финалето од Ју-Ес Опен

Завршниот чин во Торино утре ќе донесе реприза на големото финале кое пред неколку месеци го гледавме на Ју-Ес Опен, односно нова директна пресметка меѓу Јаник Синер и Тејлор Фриц.

Американецот порано денеска преку драма го совлада Александер Зверев и потврди дека е „црна мачка“ за Германецот во 2024-та година, но во обидот да стигне до титулата ќе ја има најтешката пречка во оваа календарска сезона.

Синер продолжи да брилјира и по трите победи во групната фаза стигна до нов триумф, но овој беше убедливо најсигурен на завршниот Мастерс.

Домашната публика не можеше да ужива во голем тениски спектакл, но затоа остана импресионирана од нивото на тенис кое го понуди миленикот Синер.

Јаник не му даде никаква шанса на Руд и го декласираше со 6:1 и 6:2 во полуфиналето, па сега си закажа нова финална пресметка против Фриц.

Светскиот рекет број еден славеше во Њујорк со 3:0, го победи и пред неколку дена во групната фаза, па Тејлор дефинитивно има мотиви за реванш пред утрешното финале.