Синер мора да работи на формата: Светскиот рекет број еден надигран во четвртфиналето во Монтреал (Видео)

АТП Мастерсот во Монтреал остана без светскиот рекет број еден во завршната фаза, откако Андреј Рубљов рано утрово го победи Јаник Синер во четвртфиналето на турнирот.

Рускиот тенисер мина низ навистина тежок период и зачуди со некои нервозни испади кои ги имаше на теренот, но сега се чини дека е максимално фокусиран и дека го игра најдобриот тенис во Монтреал.

Рубљов самиот посочи дека победата остварена над Синер му доаѓа навистина добро во турбулентниот период кој го оставил зад себе, додека Италијанецот ќе мора да поработи на својата форма откако поради болест не настапи на Олимписките игри во Париз.

Синер имаше добар одговор со 6:1 откако го загуби првиот сет со 6:3, но во одлучувачкиот остана без енергија и му допушти на Андреј да слави со 6:2.

Рубљов во полуфиналето ќе игра со Арналди и ќе се бори да стигне до битка за титулата, додека Синер сигурно цела енергија ќе ја насочи кон добро издание на Синсинати.