Симеоне тешко се помирува со судбината: Преовладуваат три чувства по тоа што се случи со Реал

Диего Пабло Симеоне многу тешко го прифати завршното сценарио во пенал рулетот на „Метрополитано“ и во два наврати се пожали на одлуката која беше донесена во ситуацијата со Хулијан Алварез, а иако се обидува да сврти лист и да се насочи кон следниот предизвик во Ла Лига, Аргентинецот призна дека овојпат му е доста потешко да се дистанцира од неодамна завршениот натпревар.

Тренерот на Атлетико Мадрид јавно призна дека овојпат му е потешко од било кога да се фокусира кон следниот ривал, а тоа не ниту повеќе, ниту помалку, туку големата Барселона.

Атлетико вечерва на домашен терен ќе ја пречека Барса во големото дерби во Ла Лига, па во увертирата за натпреварот, Чоло посочи кои чувства преовладуваат кај него по ВАР драмата во осминафиналето.

– Во нормални услови би рекол дека максимално сум насочен на Барселона, но оваа необична ситуација прави да ги искажам моите чувства.

– Преовладува бес, гнев и чувство за неправда. Тоа е она што го чувствувам одвнатре, но единствено што можам да направам е да продолжам да работам и да го натерам тимот да се натпреварува какошто тоа го правеше досега. Ги сфаќаме сите наши навивачи кои се лути, сите чувствуваме бес, гнев и неправда.

– Ова е тоа што го мислам, веќе нема да давам изјави за претходниот натпревар. Како што кажа Карло Анчелоти, тој меч веќе е зад нас и не може ништо да се промени. Не чека убава можност против Барселона, залудно е да се трошат епитети за нив…. Треба да излеземе на теренот и да се натпреваруваме како што тоа го правиме цела сезона, – изјави Симеоне.