Симеоне побара казна за провокаторот Куртоа: Не треба да ги исмевате луѓето (Видео)

Големото „мадрилењо“ дерби во шпанската престолнина донесе очекувана жестина и голема тензија на теренот, но нервозата се префрли и на трибините по постигнатиот гол на Едер Милитао за водство на „кралевите“.

Набрзо по голот за 0:1, главниот судија на мечот беше принуден да ги испрати фудбалерите во соблекувалната, а причина за тоа беше однесувањето на домашните навивачи, кои почнаа да фрлаат разноразни предмети во правец кон Тибо Куртоа.

Белгискиот голман не помогна со своите гестикулации по постигнатиот гол на Милитао и со својата иронична насмевка успеа да ги испровоцира најжестоките навивачи на Атлетико, кои во продолжение мораа да бидат смирнувани од Симеоне, Коке и Хименез.

По 15-минутна пауза, натпреварот продолжи и Атлетико успеа да израмни во судиското продолжение со голот на Кореа, а по поделбата на бодовите, актерите најмногу го коментираа прекинот на „Метрополитано“.

Чоло како тренер на Атлетико не ги оправда навивачите на својот клуб, но затоа побара и казна за Куртоа со кого имаше конверзација и по последниот судиски свиреж.

– Сите кои сме на теренот треба да помогнеме за да се избегнат вакви ситуации. Луѓето кои фрлија запалки не може да ги правдаме, но истото му се случи на Куртоа кога бранеше за нас кога гостувавме на „Бернабеу“. Тогаш доби запалка во глава, но сметам дека и ние кои сме на теренот не помагаме со своето однесување. Ги потценуваме луѓето, ги провоцираме луѓето, а тие нормално се лутат.

– Луѓето најчесто одговараат на лош начин. Не велам дека тоа е правилно, но ние сме тие кои треба да ги смириме страстите. Не треба да се слави на таков начин, со ироничен поглед кон трибината, со исмевање и со непотребен гест…. Луѓето се лутат во такви ситуации. Не ги оправдувам тие што фрлаа предмети, но не го оправдувам ниту тој што го иницира сето ова. Тие што фрлаа треба да бидат исфрлени, но исто така треба да бидат казнети и тие кои провоцираат, – порача Симеоне.

Видеото од прославата на Куртоа погледнете го ТУКА