Симеоне по болната елиминација: Никогаш немам видено вакво нешто, играчите на Реал си одат дома со една помисла…..

Диего Симеоне мораше да се помири со нова болна елиминација од Реал Мадрид во Лигата на шампионите, овојпат во двомеч во кој се чинеше дека Атлетико Мадрид е за нијанса подобар и поконкретен тим.

„Колчонеросите“ брзо ја надокнадија негативата од првиот натпревар и уште во првата минута поведоа на „Метрополитано“, а во продолжение пропуштија и убави можности да го решат патникот во четвртфиналето уште пред да дојде до пенал рулетот.

Во фудбалската лотарија, повеќе нерви и умешност имаа играчите на Реал, а вистински трагичар беше Хулијан Алварез чиј гол беше поништен поради двоен контакт со топката.

– Овој пенал рулет нема никаква сличност со претходните против Реал. Ова се други играчи, тука е само Облак. Нема потреба да се прави анализа во ретроспектива, ние одигравме многу добар натпревар, се натпреварувавме на неверојатен начин и можевме да го зголемиме водството по првиот гол.

– Неколку фази од мечот беа во наша полза, но на крајот се дојде до пенали. Предмалку ја видов ситуацијата со Алварез….. Судијата вели дека Хулијан ја допира топката кога се лизга со левата нога, но топката воопшто не се помрдна, мислам дека тоа е доволно за да има сомнежи околу тоа дали треба да биде гол, или не. Никогаш немам видено интервенција на ВАР при еден пенал рулет, но без оглед на се, јас останувам горд на моите играчи. Повторно не го победивме Реал Мадрид во Лигата на шампиони, но мора да се напомене дека Реал секогаш проаѓаше доста лошо во дуелите со нас. Си заминуваат од тука уживајќи во победата, но со помисла дека секогаш максимално им ја отежнуваме работата, – изјави Симеоне.