Симеоне: Нелогично е да играме во ваква ситуација

Атлетико Мадрид денеска го пречекува Лас Палмас во натпревар од шпанското фудбалско првенство, но тренерот Диего Симеоне не крие дека е незадоволен од одлуката на Ла Лига и федерацијата да се игра фудбал овој викенд.

Поплавите во Валенсија досега одземаа над 200 човечки животи, а спасувачките служби им помогнаа на над 30.000 жители кои претрпеа последици во овој несреќен момент.

Шпанската фудбалска федерација ги одложи само натпреварите Валенсија-Реал Мадрид и Вилјареал-Рајо Валјекано, а аргентинскиот стручњак смета дека е нелогично да се игра во моменти кога сликите од она што се случува во Валенсија се загрижувачки.

– За мене оваа одлука нема никаква логика.

– Она што се случува е многу тешко. Навистина е трогателно кога ги гледам луѓето како со било каков алат одат во најпогодените места и се обидуваат да помогнат.

– Таму луѓето преживуваат тешки моменти, целата ситуација е тажна, а нас ни велат дека треба да продолжиме понатаму и еве продолжуваме, – рекол Симеоне.