Шведски скијач може да загуби прст поради екстремна температура на натпревар (Фото)

Шведскиот крос-каунти скијач Михаел Еклоф не е премногу познат на пошироката спортска јавност, но во својата земја важи за еден од најдобрите натпреварувачи во дисциплината скијачко трчање.

30-годишниот Еклоф изминатите денови учествувал на специјалната трка „Ла Диагонела“ која се одржувала во Швајцарија, а сега може да остане без еден прст поради екстремните услови на делницата.

Температурата се движела меѓу 23 и 28 степени под нулата, а иако учесниците стигнале до целта, подоцна ги почувствувале последиците од својот настап на трката.

Еклоф има проблеми со прстите на нозете, а може да го загуби и палецот на едната нога.

– Во моментов ми се вртат многу мисли низ глава, но најлошата е дека можам да го загубам прстот. Толку е повреден внатрешно, што докторите не знаат дали ќе „преживее“. Времето ќе покаже дали ќе имам среќа, – изјавил Еклоф.

– Трпам многу болки, не можам да облечам обувки и постојано сум дома. Работам како продавач за да можам да си дозволам спортска кариера, но сега морав да земам боледување, – открил Еклоф, кој побара одговорност од организаторите за екстремните услови, на трката на која го освоил само 59. место.