Шпанските дисциплинци одредија казна за уличарското однесување на Кореа

Анхел Кореа ризикуваше да ја добие најжестоката казна од шпанските дисциплинци во последните неколку години, но очигледно извинувањето кое го испрати веднаш по крајот на натпреварот, направи Аргентинецот да биде поштеден од комисијата.

Аргентинскиот напаѓач на Атлетико Мадрид жестоко и вулгарно ги навреди судијата Куадра Фернандез откако заработи црвен картон, однесување за кое јавно му се извини на арбитарот неколку часа по натпреварот со Хетафе.

Дел од јавноста на Пиринеите во изминативе неколку дена шпекулираше дека Кореа може да добие суспензија од осум до дванаесет натпревари, но на крајот комисијата реши да ја активира најмалата казна.

Во соопштението се наведува дека важен дел од истрагата било и каењето од фудбалерот за стореното дело, па комисијата одлучила да го помилува со минимална казна.

Поради изустени навредливи зборови кон судијата, Кореа е суспендиран со четири натпревари неиграње, но ќе паузира и на петтиот натпревар во Ла Лига поради добиениот директен црвен картон, што значи дека вкупната казна изнесува пет меча.