Шортс подели 13 асистенции во победата на Париз

Тимот на Париз за кого настапува македонскиот репрезентативец Ти-Џеј Шортс ја забележа шестата победа во осмиот сезонски натпревар во францускиот шампионат.

Избраниците на Сплитер славеа на гостувањето кај Сан-Кантен со 97:65. Фаворитот како што покажува самиот резултат беше доминантен на овој дуел, а потврда за тоа е и фактот дека Париз ги доби сите четири четвртини.

Шортс не беше премногу активен кога се во прашање поените на овој меч и уфрли само 8 (2/4 за еден, 3/6 за два, 0/1 за три), ама затоа максимално ги разигруваше соиграчите и забележа фантастични 13 асистенции. Во елемент беше Хифи со уфрлени 6 тројки и вкупно 29 поени.

Пред Париз сега е двојната програма во Евролигата која носи пресметки со Жалгирис и Барселона.