Шокантен меч за Мурињо во Ротердам: Вифер постигна несекојдневен гол, среќата и го заврте грбот на Рома (Видео)

Во репризата од финалето во Лигата на Конференции од минатата сезона, Феенорд денеска успеа да победи на домашен терен против Рома и да стекне предност од 1:0 пред реваншот, но мора да се нагласи дека тоа го направи со голема среќа и во неверојатни услови за Жозе Мурињо.

Португалецот беше сведок на еден од најчудните и најшокантни натпревари во својата кариера, бидејќи неговиот тим пропушти да поведе од пенал во првиот дел, загуби два клучни стартери поради повреда, а за крај, топката едноставно не сакаше да влезе во голот на домаќинот.

Лошиот ден за Мурињо почна со повредата на Пауло Дибала уште во 26-та минута, а потоа пеналот кој не го реализираше Пелегрини пред крајот на првиот дел, се покажа како најава за тоа што следеше.

Феенорд поведе со несекојдневен волеј погодок од Вифер во 53-та минута, а набрзо после тоа рамото си го дислоцираше Ејбрахам кој исто така мораше да го напушти теренот.

Тука не беше крајот на малерите за Рома, бидејќи кога сите ја видоа топката во мрежата по ударот на Ибањез, Идриси успеа некако да расчисти на самата гол линија и спречи израмнување на 1:1.