Шмајхел за критикуваниот играч: Тоа е суровата реалност да се игра за Јунајтед

Питер Шмајхел беше дел од една успешна ера на Манчестер Јунајтед и многу добро знае што значи да се носи дресот на овој англиски великан.

Сега Јунајтед ги нема успесите од минатото, се обидува да се врати на победнички патеки, ама оди навистина тешко иако помина повеќе од една деценија од заминувањето на легендарниот сер Алекс Фергусон.

Играчите постојано се под лупа, има критики кога треба и кога не треба, односно не треба многу за да се заборави се добро што претходно е направено. Андре Онана беше еден од играчите за кого имаше најразлични коментари во текот на првата сезона на „Олд Трафорд“, голем притисок, меѓутоа Камерунецот издржа и остана број еден на својата позиција со тоа што сега доаѓа нова кампања во која ќе има важна улога.

-Тој немаше среќа поради две причини. Прво, немаше конзистентна одбрана. Тоа е проблем како голман. Можете да бидете најдобриот голман на светот, но ако вашата одбрана не ве штити, имате проблем. Второ, голот што го прими во Минхен беше несреќен, ако го направите тоа за Интер или Ајакс, ќе помине за недела-две. Го правиш тоа за Манчестер Јунајтед, тој останува и ќе бидеш голман кој греши. Тоа е само суровата реалност да се игра за Манчестер Јунајтед, -вели Шмајхел кој смета дека Камерунецот се подобрил во завршницата на претходната сезона.

-Видов многу подобрувања со различни работи во неговата игра во текот на сезоната. Она што особено ми се допадна е дека изгледаше како да ужива во тоа се повеќе и повеќе, тоа е првиот чекор кон тоа да станете оној што го сакате на голот. Нему му треба помош како и секој голман во светот, му треба одбрана пред него. Ако го има тоа, сигурен сум дека ќе имаме голман од светска класа со врвен квалитет, кој ќе работи добро, -порача Данецот.