Шкупи објави дека Лазаров не е во животна опасност, но заработил повреди во пожарот во Кочани

Трагичниот настан во дискотека во Кочани одзема многу млади човечки животи, а неколку стотина присутни заработија полесни и потешки повреди.

Меѓу присутните во дискотеката бил и фудбалерот на Шкупи, Андреј Лазаров, кој за среќа не е во животна опасност, иако заработил изгореници и повреди и се наоѓа на интензивна нега.

Последните информации велат дека 25-годишниот Лазаров бил хоспитализиран во болницата во Штип.

Фудбалскиот клуб Шкупи потврди дека Лазаров не е во животна опасност, му посака брзо закрепнување и изрази сочувство до фамилиите и најблиските на трагично починатите во оваа голема трагедија која ја шокираше Македонија.

– Најпрво ве известуваме дека нашиот фудбалер Андреј Лазаров е надвор од животна опасност, иако се наоѓа на интензивна нега, откако се здоби со изгореници на делови од телото во пожарот и големата трагедија што се случи во текот на ноќта во Кочани.

– Оваа информација ја потврдивме откако контактиравме со неговото семејство и роднините. На Андреј му посакуваме брзо закрепнување и враќање меѓу нас.

– Во ова тешко време, изразуваме најдлабоко сочувство за сите 51 загинати животи во оваа трагедија. Нашите срца се со семејствата на жртвите и со целата наша земја. Се надеваме дека ваквите трагедии никогаш повеќе нема да се повторат, – стои во соопштението на ФК Шкупи.

ОБНОВЕНА ВЕСТ:

Шкупи со траорно соопштение: Лазаров починал во обид да им помогне на повредените во пожарот (Фото)