Шкупи е последниот патник во полуфиналето на македонскиот фудбалски Куп

Шкупи го победи Работнички со 1:0 во последниот четвртфинален дуел од македонскиот фудбалски Куп, со што екипата од Чаир избори место во полуфиналната рунда.

Голот во 15. минута дојде по изведен корнер од левата страна и добрата реализација со глава на осамениот Марио Младеновски, а по него Шкупи не искористи уште неколку големи шанси да го зголеми водството.

Работнички ја презеде иницијативата во вториот дел, се обидуваше да израмни, но на крајот Шкупи ја одбрани предноста и ќе го очекува својот ривал во полуфиналето.

Натпреварот требаше да се игра вчера, но беше одложен за денеска поради лошите временски услови, односно лошата состојба на теренот на стадионот во населбата Маџари.

Покрај Шкупи, пласман во полуфиналето обезбедија и Воска Спорт, Тиквеш и актуелниот носител на трофејот, Македонија Ѓорче Петров.