Шкендија се пофали и со петтото зимско засилување

Шкендија сериозно смета да ја расипе забавата на Струга и Шкупи и да се вмеша во шампионската битка за титулата, нешто што може да се процени од активноста на трансфер пазарот.

Клубот од Тетово е убедливо најактивен во изминатите неколку седмици, па така денеска го потврди и петтото засилување за вториот дел од сезоната.

По Максимов, Ќака, Мујеџиновиќ и Милев, Шкендија денеска го доведе и Ералд Чинари, кој доаѓа од редовите на турски Самсунспор.

Станува збор за фудбалер со офанзивни задачи кој ставил потпис на едно иполгодишен договор, што значи дека ќе остане во Тетово до летото наредната година.

– Се чувствувам многу среќен и едвај чекам да започнам со тренинзи и натпревари. Многу навивачи на Шкендија ми испратија пораки на социјалните мрежи и направија да се чувствувам исклучително добро, – вели Чинари.