Ширер шокиран од пеналот кој го доби Ливерпул: Патетична одлука (Видео)

Кристал Палас беше подобар од Ливерпул во второто полувреме и беше блиску до израмнување на 2:2, но наместо тоа, на крајот прими гол за 1:3 и тука стана јасно дека гостите од „Енфилд Роуд“ ги освојуваат трите бода.

Алисон Бекер со своите добри реакции одигра клучна улога во победата на Ливерпул, но во самата завршница, многу полемики предизвика досудениот пенал во корист на Жота, а кој подоцна го материјализираше Фабињо за конечни 1:3 во 89-та минута.

Повторените снимки покажаа дека Жота намерно се удри во голманот Гуаите и изнуди контакт, па поради тоа, Алан Ширер не го криеше бесот и ги нападна судиите, главниот на теренот и оној во ВАР собата.

– Кога ја видов ситуацијата во живо, веднаш знаев дека тоа е голманска топка. Кевин Френд и Крег Посон треба да се засрамат, не знам како можеа да досудат толку смешна, погрешна и патетична одлука. Едностсавно глупава одлука, не знам дали може да се додаде уште некој збор.

– Стандардот на судење оваа сезона е ужасен и тоа мора да се нагласи. Имаше толку лоши одлуки, ВАР ги прави нашите судии уште полоши. Се гледа дека се под притисок и одлуките се катастрофални. Ова не е пенал во ниту еден случај, а кога ваква одлука ќе донесат поискусни судии, тоа навистина ме иритира, – порачува легендарниот Ширер.