Шира: Елмас може да си замине од Лајпциг

Македонскиот репрезентативец, Елиф Елмас на почетокот на оваа календарска година премина од Наполи во РБ Лајпциг со цел да добие вистинска шанса и простор да ги покаже своите квалитети, да биде стандарден првотимец и направи исчекор во кариерата.

Меѓутоа засега таа приказна не се движи во правецот во кој посакуваше офанзивецот, па се погласно се говори за тоа дека Елмас може да ги напушти „биковите“. Елмас има одиграно само шест натпревари во актуелнава кампања или поточно само 89 минути што е премалку, а ако се земе предвид дека тој во моментов е повреден може и неговиот престој во Лајпциг да е завршен.

На оваа тема пишува и познатиот новинар Николо Шира кој пренесува дека Елиф посакува поголема минутажа и отворено размислува за иднината, односно може во 2025 да го водиме во друга клупска средина.

Како што е познато Елмас ја започна сениорската кариера од Работнички од каде премина во турскиот великан Фенербахче. Потоа му се отвори вратат и заигра за Наполи за да сега го носи дресот на Лајцпциг со кого има договор до 30 јуни 2028 година.