Шифрин стана најуспешна Американка на Светските првенства во алпско скијање

Микаела Шифрин победи на денешниот натпревар во супер-комбинација во Кортина д’Ампецо и со златниот медал стана најтрофејна Американка на светските првенства во алпско скијање.

Тешката патека во Кортина не ја завршија голем број од учесничките, а Шифрин најави дека оди на злато откако беше трета по првата супер-џи етапа.

На слаломскиот дел Американката очекувано доминираше и на крајот го освои првото место во оваа дисциплина, со што стигна до деветти медал на Светските првенства.

Со шест златни, еден сребрен и два бронзени медали, Шифрин ја остави зад себе Линдзи Вон, која пак е поуспешна во Светскиот куп. Денешната победничка го надмина и Тед Лигети, кој е американски рекордер во машка конкуренција по бројот на златни медали (5).

Шифрин сега е на четвртото место според бројот на медали на Светските првенства од сите земји, а таму води Германката Кристин Кранцл со 15, пред Ања Персон и Мариел Гоишел со по 11 медали.

На денешната супер-комбинација, второто и третото место ги освоија Петра Влхова од Словачка и Мишел Гисин од Швајцарија.