Шчесни: Се надевам нема да ни одземат 10 бода и оваа сезона

Јувентус ја продолжи позитивната серија на резултати и во Фиренца каде ја совлада Фиорентина со 1-0 со голот на младиот Мирети во првото полувреме.

Клубот од Торино на овој начин го задржа чекорот со водечкиот Интер, поточно остана на минус два по 11. кола во Серија А што секако е позитивен знак, сигнал дека оваа екипа може да се бори за Скудетото.

Во Јувентус не сакаат да размислуваат толку далеку, па голманот Војчех Шчесни ја спомена и казната од минатата сезона, односно се надева дека нема одново да им бида одземени бодови.

-Повеќе од среќен сум со трите бода, но рано е да се гледа пласманот. Добро ни оди и постигнуваме позитивни резултати дури и на гости. Добивме тешки натпревари во Милано и Фиренца, па затоа сме многу задоволни од она што го правиме. Се надевам дека нема да ни бидат одземени 10 бода оваа сезона и дека секогаш ќе бидеме чекор понапред од останатите. Сега сме во многу подобра позиција од лани.

-Навистина не знам колку бодови имаме бидејќи треба да размислуваме натпревар по натпревар и да се концентрираме на претстојниот против Калјари. Имаме многу добар дух и млад состав во кој никој не се доживува како подобар од останатите. Имаме многу простор за развој, а од клучно значење е другарството на тимот. Имавме тешки моменти, но задоволни сме бидејќи никогаш не е лесно да се победи во Фиренца, -порача Полјакот.