Шампионот го пронајде наследникот на Османи: Ѓорѓиоски назначен за нов тренер на Струга

Ќатип Османи си поднесе оставка по поразот од Вардар во Првата македонска фудбалска лига, оставка која беше прифатена од управата на Струга Трим Љум која се впушти во акција пронаоѓање на соодветна замена.

Меритон Гега одлично си ја заврши својата задача и со победата над Гостивар ја одведе Струга во полуфиналето на Купот на Македонија, но беше јасно дека тој е само привремено решение, а официјална потврда за тоа добивме и денеска кога шампионот си подаде рака со Илчо Ѓорѓиоски.

Некогашниот прв човек на ФФМ е назначен за нов предводник на стружани, тим кој во првенството е на 5. позиција со 32 бода, додека во Купот е на два чекори од освојување на трофејот.

Инаку Ѓорѓиоски е некогашен тренер на Македонија Ѓорче Петров, Вардар, Брегалница и грчка Каламата.