Севилја му врачи отказ на Сампаоли

Шпанскиот клуб Севилја направи втора тренерска смена сезонава, отпуштајќи го Хорге Сампаоли.

Аргентинскиот стручњак беше доведен како замена за Хулен Лопетеги во октомври, но неколку месеци подоцна и самиот доби отказно решение од андалузискиот состав.

Сампаоли ја предводеше Севилја на 31 натпревар, при што беа забележани 13 победи, 12 порази и 6 нерешени резултати.

Клубот беше елиминиран во Купот од Осасуна, а успеа да стигне до четвртфиналето на Лига Европа, каде за противник ќе го има Манчестер Јунајтед.

Ситуацијата во Ла Лига е далеку од посакуваната и Севилја е блиску до опасната зона, што заедно со заладените односи со дел од фудбалерите, било и главна причина за решението на раководството.

Медиумите тврдат дека најблиску до позицијата е Хозе Луис Мендилибар.