Сетиен: Барселона побара да ѝ простам дел од парите, но……

Кике Сетиен пристигна да го „гасне пожарот“ во Барселона во необичната 2020-та година, но откако каталонскиот гигант доживеа историски срам од Баерн Минхен во Лигата на шампионите, клубот без размислување реши да му врачи отказ.

Искусниот шпански стручњак за отказот дозна од јавноста и тоа сериозно ги повреди неговите чувства, па на крајот заврши со клубот на суд откако Барселона не сакаше да му ги исплати платите кои му следат за предвреме раскинатиот договор.

Сетиен во меѓувреме работеше и во Вилјареал, но откако доби отказ и од „жолтата подморница“, Кике открива дека во моментов се уште добива отштета од двата клуба.

Всушност, Кике се раздели со Вилјареал на најдобар можен начин, но со Барселона ја доби парницата и постигна договор за исплаќање на парите на повеќе рати.

– Првично не сакав да одам на средба со луѓето од Барселона и мораше да решава судот. Пет дена пред да дојде работата до суд, Барселона побара да постигнеме договор. 16 месеци подоцна постигнавме договор, откако претходно побараа од мене да им простам дел од парите. Не бев подготвен да го направам тоа и се уште добивам пари од нив. Договорот беше да ме исплатат на рати, вистината е дека три години по мојата етапа во Барселона, се уште добивам пари за мојот договор, – открива Сетиен.