Серхио Роберто за изненадувачкиот потег: Фабрегас ми објасни неколку работи

Серхи Роберто вчера пристигна во Комо и го комплетираше трансферот за кој се зборуваше неколку дена, а за кој очигледно главен виновник е Сеск Фабрегас.

Легендарниот играч за врска експресно се префрли во тренерските води и го има првиот сериозен предизвик со Комо, клуб кој се искачи неколку скалила изминативе години и стигна до италијанската елита.

Фабре почна да го води Комо во најсилното друштво и во првото коло се увери дека му се потребни уште засилувања, па искуството на Серхи Роберто сигурно ќе биде огромен плус за неговиот тим.

– На ова гледам како на нов предизвик во кариерата, навистина верувам дека ова е голем проект. Се сретнав со газдите и тие се возбудени за целиот проект во клубот, мислам дека прават вистински работи во правилна насока и среќен сум што ќе бидам дел од ова нивно патување.

– Кога Сеск првпат ме контактираше, ми објасни неколку работи. Ми објасни какви амбиции има клубот и како од ниските лиги стигнал до Серија А во период од пет години. Сето тоа ми изгледаше возбудувачки и предизвикувачки и еве сега сум тука. Мислам дека можам да му помогнам на клубот да ги оствари целите кои ги има. Едвај чекам да почнам, – изјави Серхи Роберто.