Серезо му испрати жестока порака на Куртоа: Треба да се повика на нашите вредности

Енрике Серезо до денеска молчеше за големата ВАР драма која се случи во осминафиналниот дуел со Реал Мадрид во Лигата на шампиони, но сега во период од неколку часа одработи две интервјуа, од кои во ова второто подготви одговор и за Тибо Куртоа.

Голманот на Реал Мадрид брутално го нападна Диего Симеоне и го нарече за „плачко“ по пласманот на Реал во четвртфиналето во Лигата на шампиони, изјава со која Белгиецот само потврди дека има огромна нетрпеливост со Аргентинецот, но и со неколку членови од поранешниот клуб.

Атлетико беше клубот кој му овозможи на Куртоа да прерасне во еден од најдобрите и најценети голмани во Европа, но откако Белгиецот го облече дресот на Реал Мадрид, владее огромен анимозитет меѓу него и навивачите на Атлетико.

– Куртоа треба да замолчи, тоа е единственото што треба да го направи!

– Треба да биде благодарен што своевремено беше дел од Атлетико Мадрид. Треба да се повика на нашите вредности, треба да се однесува како што се однесуваме ние, односно како господин и џентлмен, – гласи пораката од претседателот на Атлетико.