Седмо место од 16 екипи за РК Младост на новогодишниот турнир во Белград

Во Белград се одржа новогодишен ракометен турнир за екипи од младите категории, при што учествуваа 42 тима во машка и 24 тима во женска конкуренција.

Покрај домаќините од Србија, имаше екипи и од Словенија, Хрватска, Босна и Херцеговина, додека од Македонија единствен претставник беше машката екипа на РК Младост од Ресен, и тоа генерацијата од 2009 година. Меѓу 16 екипи во оваа конкуренција, младите надежи на ресенскиот тим го освоија солидното 7 место.

Покрај тоа, тројца ракометари на македонската екипа успеаја да го понесат и признанието МВП на одделни натпревари, а тоа беа Љупчо Јовановски, Симон Јовановски и Благој Јончевски.

– Задоволство беше да се присуствува на ваков квалитетен турнир, на кој се стекнува големо искуство за овие млади и надежни ракометари. Освен што ќе напредуваат во својата игра, ќе стекнат и пријателства, а можат да бидат забележани и од ловците на таленти. Околу пласманот, седмото место во оваа конкуренција го сметам за успех од едноставна причина што не бевме комплетни. Имаме млади ракометари во кои препознавам потенцијал да се изградат во носители на играта на суперлигашките клубови, но до тоа ниво се стигнува со многу труд, тренинзи и вакви квалитетни меѓународни натпревари. РК Младост веќе две децении егзистира на овој начин, а Ресен одамна е на мапата на македонскиот ракомет како расадник на нови таленти. На играчите и нивните родители кои веруваа во нив им ги честитам Новогодишните и Божикните празници, посакувајќи им здравје и среќа, но и истрајност и верба во себе, елементи кои се неопходни за спортски успех,- вели Сандре Темелковски – Рапо, кој ја предводеше екипата на овој турнир.