Се повлекоа, па се вратија на терен и го доиграа мечот: Еурофарм Пелистер во драматичен финиш поразен во финалето

Ракометниот македонски шампион Еурофарм Пелистер е поразен во големото финале на пријателскиот турнир во турски Болу од Мешков Брест со резултат од 31-35.

Мечот го одбележа драматичен финиш во кој битолчани и се повлекоа од теренот незадоволни од судиската арбитража. Сепак по убедување и дијалог помеѓу двете екипи и делегатот, „зелено-белите“ се вратија и го доиграа мечот.

Кобниот момент се случи на три минути пред крајот на мечот при негатива за нашата екипа од -1 (32-31) и напад на Белорусите. Во спорниот напад имаше и пробивање од еден играч на Мешков, како и удар во лице на Радивојевиќ, но судиите го признаа голот за +2 (33-31) кој што го дадоа во овој напад.

Токму Радивојевиќ како и Емилијан Ѓорговски со по шест гола беа најефикасни кај Еурофарм Пелистер, додека Борзаш даде еден помалку, пет.