Саутгејт најави дека ќе игра со најсилен состав против Македонија: Ова е Англија, нема да испратиме погрешна порака

Англиската фудбалска репрезентација стартуваше со „два од два“ на квалификациите за Европското првенство и сега многу помирно ќе го дочека месец мај, кога ќе продолжат возбудувањата во овој циклус кој е најава за континенталниот турнир во 2024-та година.

Тимот на Герет Саутгејт покажа навистиан две сериозни лица против Италија и Украина и оствари две победи, но англиските новинари го прашаа селекторот дали ќе експериментира во месец јуни, односно дали ќе го одмора најголемите ѕвезди и ќе повика други фудбалери за натпреварите со Малта и Македонија.

Англиските новинари сметаат дека дел од најважните репрезентативци заслужуваат пауза после напорната сезона која ќе трае до почетокот на месец јуни, но тоа мислење не го дели и Саутгејт кој најави дека ќе пристапи против Македонија со најсилен состав.

– Ние ја претставуваме Англија и ќе играат најдобрите. Секој повик мора да биде заслужен, ништо не е подарено. Хари Кејн не сака да пропушти ниту еден меч за Англија, бидете уверени во тоа. Играчите се физички и психолошки подготвени кога доаѓаат да играат за репрезентацијата.

– Ако не повикаме и одмориме одредени фудбалери за тие два меча, ќе испратиме погрешна порака до цела група. Ништо не може да се предвиди во фудбалот, изминатава недела загубивме двајца играчи и затоа сите најдобри мора да бидат тука, – изјави Саутгејт.

Англија игра против Малта на 16-ти јуни, а три дена подоцна ќе ја пречека Македонија на „Вембли“.