Сари во свој стил: Лигата на шампионите е како забава…

Лацио утре го пречекува Феенорд во средбата од 4. коло во Лигата на шампионите, средба на која калчолигашот ќе цели кон позитивен резултат, победа со која ќе си ги отвори вратите кон пласман во нокаут фазата.

Тоа нема да биде лесно со оглед на тоа што холандскиот прволигаш е квалитетен тим и тоа го покажа на првото соочување во кое славеше со 3-1. Утрешната средба ќе покаже дали Лацио ја научил лекцијата, но и дали овој состав може да направи нешто повеќе во ова натпреварување кое тренерот Маурицио Сари го посочи како второстепено за клубот, поточно како забава.

-Ако имаме шанса да се вратиме во Европа, тоа ќе биде преку лигата. Играњето во Лигата на шампионите е неверојатно, мора да играме одлучно, но мора да имаме јасност да размислуваме и за се друго. Кој нема да се квалификува во Лигата на шампионите ќе биде во неволја.

-Лигата на шампионите е како забава, но лигата е наша работа, -порача Сари во негов стил.

Лацијалите се на 10. место во Серија А, а во следното коло се соочуваат со најголемиот ривал Рома.