Сантош: Кристијано погрешно ја разбра мојата одлука, се немаме слушнато од мундијалот

Фернандо Сантош се запиша во историјата како селекторот кој и ја донесе големата европска титула на Португалија, но на крајот неговиот мандат заврши доста разочарувачки, но и со своевиден раскол во соблекувалната поради тоа што го налути капитенот.

Сантош беше отпуштен од Португалија по елиминацијата на Светското првенство, а поразот од Мароко беше надополнет со неиграње на најголемата ѕвезда во стартната постава, капитенот Кристијано Роналдо.

Голгетерот не беше во почетните 11 и беше огорчен од односот на селекторот со кого претходно беше многу близок, а иако оттогаш поминаа цели 11 месеци, Сантош открива дека во ниту еден момент се нема слушнато со Роналдо.

– Сега би ја донел истата одлука, тоа беше стратешка одлука за доброто на тимот. Јас секогаш го ставам тимот на прво место, тоа не беше лесна одлука и поради лични причини, поради пријателството кое го имавме.

– Едноставно тој не беше во ритам, беше надвор од ритам како никогаш претходно поради случувањата во Манчестер Јунајтед. Пробавме да го вратиме во најавата за мундијалот, но не беше така како што посакувавме. Ако го поминевме Мароко и потоа Франција, можеби ќе беше стартер на следниот меч. Кога му се јавив да му кажам дека нема да биде стартер, лошо ја разбра мојата одлука и го немам слушнато оттогаш. Но, повторувам, повторно би ја донел истата одлука и сигурен сум дека еден ден ќе се сретнеме и дека ќе се сеќаваме на добрите моменти кои ги имавме заедно, – вели Сантош.

Искусниот стручњак по отказот од Португалија замина во Полска, но и таму мина доста лошо и заработи отказ после само неколку месеци.