Салах не го отпишува шампионот: Сити е Сити…

Ливерпул славеше над Саутемптон со 3-2 и со тоа го искористи новиот кикс на Манчестер Сити и сега е осамен на врвот на табелата со плус осум во однос бранителот на титулата.

„Црвените“ се мачеа со „светците“, ама пронајдоа решение да дојдат до посакуваниот резултат со двата гола на Мохамед Салах во второто полувреме.

Токму Мо е задоволен од развојот на настаните, позитивната атмосфера пред дербито со Сити кое е закажана за наредната седмица и на кое Ливерпул со победа може да дојде и до двоцифрена предност по само 13 одиграни кола во Премиер лигата, нешто што не го замислуваа ниту најголемите оптимисти, навивачи на овој клуб,

-Тие (головите) беа многу важни, особено откако бевме во негатива од 2-1. Најважно е што го добивме натпреварот. Секој меч е различнен. Тие [Саутемптон] имаа план за игра и одиграа многу добро. Успеавме да се вратиме и да го добиеме натпреварот. Мислам дека имаме добар план за игра, ја одигравме нашата игра и бев убеден дека ќе создадеме шанси. Супер е. Се надеваме дека ќе продолжиме во таа насока, -рече Мо и додаде:

-Имаме натпревар против нив [Манчестер Сити] па се надеваме дека ќе го добиеме и ќе одиме на 11 бода предност. Сити е Сити. Минуваат низ лошо време, но имаат одлични играчи, -порача офанзивецот за „Скај Спортс“.