Саки го посочи главниот проблем на Милан: Најголемата грешка…

Милан бележи пад во формата и најдобар доказ за тоа се резултатите од кои особено болен беше поразот од Удинезе на „Сан Сиро“.

„Росонерите“ освоија само еден бод на последните три средби во Серија А, а лошо му оди и во Лигата на шампионите каде се уште чека на првиот гол и со два бода е на четвртата позиција во групата Ф во конкуренција на ПСЖ, Борусија Дортмунд и Њукасл.

Ова прави да се зголеми притисокот врз тренерот Стефано Пиоли, навивачите се незадоволни и имаше свирежи по поразот минатиот викенд, но според легендарниот Ариго Саки предводникот на „црвено-црните“ не е виновен за актуелната ситуација.

-Има ли некој што мисли дека е виновен Пиоли? Се надевам дека не. Мислам дека најголемата грешка е направена на стартот. Оттука почнаа сите проблеми. Беа потпишани премногу странски играчи. На оние кои доаѓаат од странство им треба малку време да ја разберат нашата лига и нашите методи. Овие момци изгледаат збунети и резултатот е дека Милан не секогаш изгледа како тим. Мислам дека свирежите беа фер бидејќи изведбата беше ужасна. Факт е дека нема доволно време да влезе во главите на играчите и да ги убеди да станат колектив, -порача Саки кој смета дека Стефано треба да најде „лидерство“ во неговиот тим.

Калчолигашот има средби со ПСЖ и Лече пред новата репрезентативна пауза.