Сака: Ми недостасуваат тројца играчи кои си заминаа од Арсенал

Букајо Сака заработи мала повреда на дербито против Тотенхем и се чинеше дека истата пристигна во најлош момент, но испадна дека станувало збор само за претпазлив потег кој не го донесе во прашање неговиот настап со Аталанта, а подоцна и со Манчестер Сити на крајов на неделава.

Крилниот напаѓач му е достапен на Микел Артета и останува да се види дали ќе биде искористен уште во стартната постава вечерва во Бергамо, но судејќи по неговата важност за тимот, сигурно е дека ќе добие шанса во текот на 90-те минути.

Сака пред натпреварот во Лигата на шампионите говореше дека се чувствува добро и дека нема последици од ударот против Тотенхем, но на јавноста и откри дека во последно време му недостасуваат и тројца играчи кои решија да си заминат од Арсенал ова лето.

Арсенал остана без Нелсон и Смит Роу кои се преселија во редовите на Фулам, но го ослободи и Енкетија кој направи трансфер во Кристал Палас.

– Нема да лажам, ми недостасуваат тројцата. Откако влегов во првиот тим на Арсенал, тие тројца беа како постари браќа за мене и ме чуваа и беа заслужни за топлото добредојде. Не беше лесно да се прифати дека си одат, но истовремено сум и среќен за нив.

– Станува збор за тројца топ играчи со огромен квалитет и сигурен сум дека ќе блескаат во Премиер лигата оваа сезона, – вели Сака.